Nasurok limagasut a trabaho ti indiaya ti Austria kadagiti Filipino skilled workers nga agsapsapul iti trabaho iti sabali a pagilian iti naisayangkat a Philippines-Austria Friendship Week Mega Job Fair.
Indauluan ti Department of Migrant Workers (DMW) ti event iti pannakitinnulong ti Austrian Embassy idiay Manila para iti panag-match ti Filipino talents iti kasapulan a trabaho iti ballasiw-taaw.
Segun ti DMW, walo a private recruitment agencies iti nakipaset tapno mangidiaya ti 546 job orders idiay Austria ken dadduma pay nga industriya pakairamanan ti healthcare, hotel ken restaurant, customer services ken dadduma pay.
Paset pay ti event ti pre-employment orientation seminar tapno ikkan ti ammo dagiti aplikante mainaig iti realidad ti panagtrabaho iti ballasiw-taaw, panangliklik iti illegal recruitment ken human trafficking.
