Nakaituding a bumisita iti pagilian ita a lawas ni Australia Deputy Prime Minister ken Defense Minister Richard Marles tapno paingeten ti kammayet ti depensar ti Australia ken Pilipinas.
Agsarak da Marles ken Defense Secretary Gilberto Teodoro Jr. iti maikadua nga Australia-Philippines Defense Ministers’ Meeting a maisayangkat inton Biernes idiay Makati City.
Segun ti Department of National Defense (DND), mapagpapatangan iti taripnong ti panangpapigsa ti kooperasyon ti depensar pakairamanan ti capacity building ken panangpasayaat ti interopability iti dua a pagilian.
Karaman pay iti agbalin nga agenda ni Marles ket ti panagbisita kadagiti tropa nga Australian a karaman iti Alon exercise 2025 a kadakkelan nga oversas joint training activity iti Australia ita a tawen.
