Impaganetget ti Bureau of Immigration (BI) nga awan ti rekord ti recent travel ni Atong Ang kasaruno dagiti pakaammo a posible a naglibas idiay Cambodia gapu iti nairuar nga arrest warrant maipanggep iti kaso dagiti mapukpukaw a mannadi.
Segun ken ni BI Spokesperson Dana Sandoval, awan pay iti legal a panagpanaw ni Ang ken awan ti indikasyon a nagaramat iti ilegal a ruta.
Monmonitoren ti Philippine Coast Guard (PCG) ken lokal nga otoridad dagiti posible nga ilegal a pagdalananna.
Segun ken ni Interior Secretary Jonvic Remulla, patien dagiti otoridad nga adda iti Pilipinas ni Ang, no man pay adda raw information a posible nga adda idiay Cambodia gapu iti online sabong operations.
Kinunana a mabalin a kiddawen ni Pres. Ferdinand Marcos Jr. iti pannakakemmeg ni Ang idiay Cambodia no mapaneknekan iti impormasyon.
Naidiaya ti P10 million reward para iti impormasyon iti ayan ni Ang a kakaisuna nga akusado nga aglemlemmeng iti kaso a multiple kidnapping with homicide ken serious illegal detention.
