VIGAN CITY – Agtultuloy iti assessment kadagiti pagtaengan ken pasdek iti siudad ti Vigan kalpasan iti pannakaapektarda iti napasamak a ginggined idi napalabas a lawas.
Iti pannakiuman ti Bombo Radyo Vigan kenni Vigan City Vice Mayor Randy Singson, adun a pasdek iti dimmalanen iti assessment ket adda dagiti immunan a naglukat iti napalpalabas nga aldaw.
Segun ken ni Vice Mayor Singson, nu maleppas amin nga assessment ket maisarunonton a maaramid ti programa para iti pannakaisimpa dagiti nasao a pasdek.
Impakaammona pay a nagkari ni Mayor Bonito Singson a tumulong babaen iti panangsapulda iti pondo kangrunaan iti agtaud iti UNESCO nga isu ti rumbeng a pagpatulungan nu adda iti maisimpa a world heritage.
Kabayatanna, nagpalagip met ni City Councilor Engr. Larry Raboy, Chairman ti Committee on Infrastructure kadagiti adda gandatna nga agpatakder iti commercial, residential wenno aniaman a pasdek nga idalandan iti inspeksyon tapno masigurado ti kinatalged aglalo nu adda iti gingined a mapasamak.
