VIGAN CITY – Inamin ni Samahang Industriya ng Agrikultura (SINAG) Chairman Engr. Rosendo So a saan a makontrol iti panagwaras ti African Swine Fever virus agingga nga awan iti bakuna a mapartuat kontra ti nasao a virus.
Ti pannaki-uman ti Bombo Radyo Vigan ken ni So, uray nu nainget dagiti quarantine checkpoints a maipatpatungpal kadagiti naduma-duma a paset iti pagilian, adda latta dagiti sukir nga agibibiyahe kadagiti baboy ken agiliblibas kadagiti pork wennu frozen meat products a maiserrek kadagiti probinsiya a mabalin a pangrugyan ti ASF a maka-apektar kadagiti agtartaraken ti baboy.
Nu pay kasta, namnamaen na nga inton sumaruno a bulan ket makissayan ton dagiti baboy a maapektaran ti ASF ta bumaranton iti panawen ket agsublin ton iti sigud a resistensiya dagiti baboy ta mamati a ti nalamiis a paniyempo ket dakkel iti epekto na iti salun-at dagiti baboy ta nalaklaka da nga agsakit.
Kabayatanna, agsipud ta adun dagiti naapektaran ti ASF ditoy Luzon, amken na nga inton June wennu July ket makurangan ti local production iti karne ti baboy.
