Hustisia ti kiddaw ti asawa ti tricycle driver a natay iti pammaltog iti national highway ti Barangay Panay Norte, Magsingal, Ilocos Sur.
Ti biktima ket maysa a lalaki nga agtawen iti uppat a pulo ket lima, agnaed iti Barangay Muraya, San Juan a maysa pay a CAFGU member.
Iti pannaki-uman ti Bombo Radyo Vigan ken ni alyas “Gema”, asawa ti biktima, ikarkararagna a magun-odda met laeng ti hustisia iti pannakatay ti asawana.
Awan ti nadakdakamat kenkuana ti asawana a nakariri wenno nangpangpangta iti biagna isu a burburtia no apay a napaltugan.
Inladawan ni alyas Gema ti biktima kas maysa a responsable nga asawa ken ama kadagiti 3 nga annakda.
Maipalagip a ti biktima ket napan nagitulod iti pasaherona idi pinaltugan ti saan pay nabigbig a suspek a dagus a naglibas.
Kabayatanna, manarimaan met ti naan-anay a panangduktal dagiti kameng ti Magsingal Police Station tapno maammuan no ania ti motibo ti pammaltog.
Ti biktima ket nagsagrap iti tallo a tama ti paltog ti bagina a pakairamanan ti tengnged, bakrang ken sakana.
