Vigan City – Naballaygi iti naisayangkat a search warrant operation iti maysa a mannalon ken aktibo nga army reservist idiay Brgy. San Agustin, Candon City.
Segun kenni Police Lt. Col. David Dulnuan, naawat da iti report manipod kadagiti agnaed iti nasao a lugar nga agpatpaputok iti paltogna ti suspect a ni Erwin Villanueva Toroc, agtawen uppat a pulo ket walo iso a nangiwayat da iti search warrant operation iti pagtaengan na.
Naala manipod iti pagtaengan ti suspect ti Shooter Cal 5.56 Rifle(M16) nga adda scope na, sangapulo ket maysa a magazine para iti nasao a paltog, duwa gasut tallo pulo ket innem a bala ti caliber 5.56 rifle, innem a pulo a bala ti 7.62 rifle, ARMSCOR FS PS M1911 Cal. 45 Pistol nga addaan Serial No. 1185537 a naka rehistro ngem expired ti License to Own and Possess Firearm na, duwa a magazine ti cal. 45, duwa pulo ket maysa a bala ti cal. 45, innem a piraso ti empty cartidge ti Cal. 45, holster ken dadduma pay.
Nagpalagip ti hepe kadagiti umili nga addaan iti paltog nga ipaima da palang kadakuada kabayatan iti panagproseso iti dokumento da tapno saan da a maisayangkatan ti search warrant operation. Ti agdama maisagsaganan iti kaso a panaglabsing ti Republic Act 10591 kontra ti suspect.
