--Ads--

Impalagip ni Archbishop Marlo Peralta manipod Archdiocese of Nueva Segovia kadagiti umili nga adda iti maaramidanda tapno labanan iti korapsyon ti pagilian.

Dayta ket kasaruno iti naisayangkat a Peaceful Prayer Rally against corruption, dredging and political dynasty itattay, October 19, 2025 manipod Immaculate Conception School of Theology (ICST) agingga iti Plaza Burgos, Vigan City.

Segun ken ni Archbishop Peralta bayat iti nasantoan a misa idiay Plaza Burgos, mabalin a labanan iti korapsyon iti bukod a wagas babaen iti panangliklik kadagiti dakes nga aramid.

Inlawlawagna a nalaka laeng a masulisog dagiti tattao, ngem iti panangibaga a “saan” kadagiti dakes nga aramid ket makatulong a labanan iti kinadakes a kas iti korapsyon.

-- ADVERTISEMENT --

Impalagipna ita a tawen a “Year of Hope” isu a saan a rumbeng a mapukawan iti namnama dagiti umili a maleppasto latta iti korapsyon ta patienna nga agaramid latta iti wagas ti Namarsua tapno malabanan iti korapsyon.