Daydaywen ita dagiti turista ti Ar-arbis Falls iday Sitio Baybayatin, Barangay Collago, Lagayan, Abra, a saan laeng nga agserserbi a pagpasiaran no di ket mangted iti nayon a pagsapulan kadagiti local tour guide.
Malaksid iti buya ti falls, maysa pay kadagiti maidiaydiaya nga aktibidad ti extreme river tubing, a mangipapaay kadagiti turista iti adventurous a kapadasan.
Sakbay a magteng ti falls, kasapulan a magna dagiti turista iti 30 a minutos para iti mapatta-patta a 3-km trail.
Para kadagiti interesado a bumisita, mabalin ti ag-pre-register iti official page ti Tourism Office.
Nagpalagip met ni Mayor Edmarc Crisologo a nainget a maipatpatungpal iti lugar ti CLAYGO wenno “Clean As You Go” tapno mapagtalinaed ti kinadalus ken pannakataripato ti aglawlaw.
Kabayatanna, adda dagiti safety restrictions iti river tubing agraman ti pannakaiparit iti panaglugan dagiti maladaga.
Agtultuloy nga italtal-o ti lokal a gobierno ti Ar-Arbis Falls kas tourism destination a mabalin a pagpasiaran agingga Disyembre, kagiddan ti pannakaipaay ti oportunidad kadagiti agindeg a makasapul manipud iti turismo.
