Inwaragawag ti Civil Service Commission a nangrugin ti aplikasyon para iti 2025 Career Service Examination -Pen and Paper Test para iti Professional ken Sub-professional level.
Naituding ti exam inton Marso 2, 2025 idinto a ti aplikasyon ket nangrugi idi November 19 ken agpatingga inton January 3, 2025.
Iti pannaki-uman ti Bombo Radyo Vigan ken ni Mary May Querubin, Senior Human Resource Specialist to CSC-Ilocos Sur Field Office, online ti wagas ita iti panag-apply tapno saan nga agdudupudup dagiti aplikante a mapan iti field office.
Para kadagiti requirements ket mabalinda a bisitaen ti ocserg.gov.ph a pakakitaan dagiti naan-anay nga impormasyon.
Nasurok kumurang 2,600 ti nailatang nga slot iti probinsia ket 1,485 para iti Vigan.
Iti agdama, addan ti tallo gasut a nakarehistro iti probinsia.
Maisayangkat ti exam kadagiti 92 testing centers iti intero a pagilian.
