VIGAN CITY – Immatrasen amin a kandidato para konsehal ti grupoda incumbent Pilar, Abra Mayor Mark Roland Somera ken Vice Mayor Jaja Josefina Disino dua pulo ket pito nga aldaw sakbay iti panagpipili.
Iti pannaki-uman ti Bombo Radyo Vigan kenni Pilar Abra Election Officer Rodrigo Basa II, nakaawatda iti tawag manipod kenni incumbent Sangguniang Bayan Member Mario Molina Bañez inaig iti panagsanudna ti kandidaturana.
Awan iti rason a nakaikabil iti panagsanud ni Bañez ken kadagiti napalabas nga aldaw April 7 immunan a nagsanud dagiti pito a kandidato para konsehal ti ili a da Leilanie Disono, Teresita Doral, Rogelio Ciervo, Timoteo Dasalla ken Macario Guzman, George Dela Rosa Sotelo, incumbent Sangguniang Bayan Member Cresencia Sotelo Ferido.
Innayon ni Basa a mai-ururay laengen ti opisyal a pannakaideklara dagiti walo a kandidato manipod ti bangir a partido.
Iti agdama da Mayor Somera ken Vice Mayor Disono ti nabatbati a kandidato ti KBL ti nasao nga ili kontra ti kabalubalda a kasinsin dagiti opisyal a ni Tyron Christopher Reyna Berona ken ti para bise mayor a ni Samson Costales Laguesma ken walo a kadduada ti konseho.
Kabayatanna, manannama nga agturong dagiti Comelec official iti national idiay Pilar, Abra kalpasan ti Semana Santa inton Abril 21 iti agdama a tawen.
