Maisayangkat ti Amianan Book Festival 2026 iti Provincial Farmers Livelihood Development Center – Vigan City inton Setyembre 4 agingga 5, 2026 a ti gagemna ket ital-o ti panagbasa, panagsurat, ken ti Literatura Ilokana.
Tampok iti festival dagiti book sellers, exhibitors ken nadumaduma nga aktibidad para kadagiti mahilig iti libro ken literatura.
Iti pannaki-uman ti Bombo Radyo Vigan ken ni Eliseo Contillo, GUMIL Ilocos Sur President, karaman kadagiti aktibidad ti book reading, pannakayam-ammo dagiti mannurat nga Ilokano, tungtungan dagiti mannurat manipud Ilocos Sur, art workshop, ken pannakayalnag dagiti libro.
Iti umuna nga aldaw ti aktibidad, maaramid ti “Tungtongan: Ti Probinsia tayo ken ti Panagsuratko,” a pakatrataran iti kapadasan iti panagsurat dagiti premiado a mannurat kas kada Contillo, Archie C. Anipot, Danilo B. Antalan, ken ni Danilo B. Bautista.
Libre ti iseserrek iti Amianan Book Festival 2026 isu a maawis ti publiko a makikaysa iti dua nga aldaw a panangrambak iti literatura ken kultura.
