Nakaro nga Arctic air ti nangapektar kadagiti sumagmamano a paset ti Amerika ita nga umuna a lawas ti Disyembre, a nangitunda iti nalamlamiis ngem iti gagangay a temperatura iti amianan ken laud a rehion.
Segun iti Nationwal Weather Service, bimmaba iti 10-15 degrees ti temperature iti Northern Plains ken Upper Midwest, idinto a nairuar iti snow squall advisories iti New England gapu iti bigla a panagtudo ti niebe.
Manamnama a mangapektar pay ti maysa a winter storm manipud Texas agingga Delaware a mabuyogan iti napigsa a tudo, posible a freezing rain, ken niebe idiay Tennessee Valley agingga Mid-Atlantic.
Agtultultuloy ti panagballaag dagiti eksperto a mabalin a mangitunda iti nagalis a kalsada ken pannakaitantan ti biahe dagiti agsasaruno a weather system kabayatan ti panagtultuloy ti nalamiis a paniempo.
