VIGAN CITY – Maysa nga American National ti nasarakan nga awan biagna iti uneg ti kwarto idiay Barangay Poblacion East, San Ildefonso, Ilocos Sur.
Nabigbig ti gangannaet a ni Michael Robert Metzler, agtawen iti innem a pulo ket tallo, taga-New Orleans, Louisiana, USA ngem agnanaed iti Poblacion East, San Ildefonso.
Nakaawat ti San Ildefonso Police Station iti report manipud ken ni Caroline Bueno Metzler, agtawen iti tallopulo ket walo a ti asawana ket naitaray iti Metro Vigan Cooperative Hospital, Bantay.
Idi naawatda ti report, nagturong dagiti pannakabagi ti linteg iti nasao nga ospital ket iti panangsalsaludsodda iti asawa ti biktima, kunana nga alas singko kwarenta y singko iti malem idi kalman (May 30, 2024), simrek ti anakda iti kuartoda ket nakitana ti amana iti datar nga awan puotna isu a tinawaganna ti inana.
Nagpaarayat ni Caroline kadagiti karrubana ket intarayda ti asawana iti ospital ngem daksang gasat ta iti alas sais trenta y kuatro iti rabii, naideklarar a dead on arrival.
Natakuatan a Myocardial Infarction ti rason ti nakatayanna.
