Nagreklamo ti maysa nga ama kalpasan ti mapapati a pannakadangran dagiti putotna kadagiti ikitda a mangay-aywan ita kadakuada idiay Barangay San Jose, Vigan City, Ilocos Sur.
Iti pannaki-uman ti Bombo Radyo Vigan iti ama dagiti ubbing, indanon kenkuana ti buridek a putotna a sinaplitan ti ikitda ti inunaanna ken nakitana ti paset ti bagina a naglamma kalpasan ti insidente.
Pimmusayen ti ina dagiti ubbing gapu iti aksidente idi napan a tawen, idinto a nagsina dagiti nagannakda, tallo a tawen sakbay daytoy a mapasamak isu a naikustodia dagiti ubbing iti ikitda.
Gapu iti napasamak, kayat ti ama nga alaenen dagiti putotna manipud iti puder ti ikitda ken nakasagana a mangipila iti reklamo.
Kabayatanna, pinaglibakan met ti ikit dagiti ubbing ti pammabasul ti amada, ket inkalinteganna a saanna a dangdangran dagiti ubbing.
Segun iti ikit dagiti ubbing, naipurwakna laeng ti lupot ta pinagsawsaw-an isuna ti ubing iti agkakadakes ken inlunedna pay a kunana ket matay laengen koman.
Mapapati a napasamak daytoy kalpasan a saan a napalubosan nga agmaneho iti motorsiklo ti ubing a mapan agsingir iti bayad ti sabong gapu ta menor de edad pay laeng.
Kimmontra pay met ti kasinsin ti naireklamo kadagiti pammabasul ti ama, agramanen ti mapapati a panangkunsintir ti pamilia a makidenna iti sabali a lalaki daydi ina dagiti ubbing, ta kunana nga immuna a nagaramid iti madi ti ama.
Segun kenkuana, adu dagiti dakes nga aramid ti ama, agraman ti panangisaldana iti service motorcycle-na a bulod laeng ken adda pay dagiti nakabasbasulanna kadagiti dati a nagubraanna.
Kunana a pudno a mangted ti sustento ti ama para kadagiti putotna, ngem saan nga umanay tapno masupusupan ti inaldaw a pagkasapulanda.
Indiayaanda pay nga agtalinaed iti lugardan tapno maaywananna dagiti putotna ngem saan a natuloy ta ti kayat ti nasao nga ama ket ikabbalayna ti babaina.
Nupay kasta, naituding ti personal a panagpapatang dagiti maseknan a partido para iti naan-anay a pannakalawlawag ti tunggal maysa kadakuada.
