Nakemmeg ti maysa a lalaki gapu iti panangbagkongna iti amana idiay Barangay San Ramon, Magsingal, Ilocos Sur.
Nabigbig ti suspek a ni Christian Isaac Torres, agtawen iti duapulo ket dua, welder, agnaed iti nasao a lugar.
Ti met biktima nga ama ti suspek ket ni Pritzel Pagay Torres, agtawen iti uppat a pulo ket lima, construction worker.
Nagresponde dagiti pannakabagi ti linteg ket narekobreda ti maysa a kutsilyo manipud iti nakapasamakan ti krimen.
Iti pannaki-uman ti Bombo Radyo Vigan ken ni Police Captain Melvin Trinidad iti Magsingal Police Station, agin-inom dagiti agama idin ta rimsua ti saanda a nagkinnaawatan ta patpaturogendan ti biktima ngem saanna kayat ket nakabilna pay ti maysa nga anakna isu a napan inanawa ti suspek ket saanna a napupuotan a naiduyok iti biktima ti kutsilyo.
Nagsagaba iti tallo a tama iti bukot ken akin-kannigid a barukong ti biktima a naitaray iti ospital.
Dagus met a naiwayat ti hot pursuit operation a nakakemmegan ti suspek.
Kabayatanna, pinasingkedan met ti maysa pay a putot ti biktima a ni John Lloyd Torres a galad ti amadan a no mabartek ket kamatenna ida iti badang.
Nupay kasta, kununa a no kayat la ketdi ti amada ket pagpapatanganda lattan ti napasamak ta awan met ti sabsabali kadakuada.
