Agtultuloy ti panangsapul ti Tagudin Police Station tapno matunton ti maysa nga ama a mapapati a nangbagkong iti agtawen-iti-tallo nga ubing a putotna idiay Barangay Lacong, Tagudin, Ilocos Sur ken maammuan no apay a naaramidna ti krimen.
Iti pannaki-uman ti Bombo Radyo Vigan ken ni Police Major Kleyvan Paycao Dalang, ti ama a maibilang a person of interest ket naggapu iti rehabilitation center ken sinublianna ti bisiona kas ti panaginom iti arak ken panagsigarilio.
Maipalagip nga ala una iti parbangon idi Agosto 28 ket nangngeg pay laeng ti lola ken ikit ti biktima nga agpatpatang dagiti agama.
Idi bumigaten, nakadlaw dagiti kabbalay ti biktima gapu ta saan pay daytoy a rimmuar manipud iti kuarto.
Gapu dayta, linukatan ti lola ti kuarto ket nasarakanna ti biktima a naulesan ket idi ikkatenna, nakitana a dara-dara ti barukong ti biktima isu a dagus nga intarayda iti ospital ngem dead on arrival.
Segun pay ken ni Dalang, nagsagaba iti tallo stab wounds ken broken ribs ti biktima a puon ti nakatayanna.
Nakasarak met dagiti pannakabagi ti linteg iti tallo a klase ti patadem iti nakapasamakan ti krimen nga isu ti indalanda iti forensic test tapno maduktalan no adda pakainaiganna daytoy iti pasamak.
