VIGAN CITY – Kaso a Frustrated Parricide ti sangwen ni Gerardo Hufemia Santos, agtawen iti uppat a pulo ket maysa, karpentero nga agnaed idiay Barangay Luba, Sta. Lucia gapu iti panangtagbatna ti putotna a lalaki a menor de edad.
Iti pannaki-uman ti Bombo Radyo Vigan ken ni Police Staff Sergeant Albert Benitez iti Sta. Lucia Municipal Police Station, nakainom ti suspek idi simmangpet iti pagtaenganda ket bayat ti pannanganna dimteng ti putotna a mapan met mangan ngem iti panagalana ti taraon ket immasideg ti ama nga adda ikotna a badang nga isu iti intagbatna iti putotna.
Segun ken ni Benitez, gapu ti nasagrap ti menor de edad ket nagpaarayat isu a dimteng ti ina ken kabsatna a nanganawa ti amada.
Apaman a nakaadayo ti menor de edad iti amana ket timmaray a napan iti karrubada nga isun ti nangitaray kenkuana iti Ilocos Sur District Hospital- Sta. Lucia.
Gapu iti pannakatagbat ti menor de edad ket nadunor ti akinkannigid ken kannawan a takyagna.
Kabayatanna, naduktalan a nakasoan idin ti suspek ti panaglabsingna ti Republic Act 9262 wenno Anti-Violence Against Women and their Children Act of 2004 ta kabkabilenna idi ti asawana ken namin-ano a darasen a nagprubokar a gappuanan ti panagreresponde latta dagiti otoridad iti nasao a lugar.
VIDEO – POLICE STAFF SERGEANT ALBERT BENITEZ
