VIGAN CITY – Kaso a Frustrated Parricide ken Illegal Possession of Firearms iti maipila kontra ti suspek iti pammaltog idiay Brgy. Manzante, Magsingal.
Iti pannaki-uman iti Bombo Radyo Vigan ken ni PMaj. Joel Castillo iti Magsingal Police Station, kitkitaendan no agsina a maipila dagiti nasao a kaso kontra ken ni Vicente Farinas Sr., agtawen iti innem a pulo ket innem kalpasan a pinaltoganna ti putotna a ni Vicente Farinas Jr., agtawen iti tallopulo ket walo nga agpada a taga-Sitio Lussoc Brgy. Manzante, Magsingal.
Segun ken ni Castillo, nakainom ti biktima idi naisawangna saanna a kabuteng ti amana bayat ti pannakisaritana iti cellphone idi nanggeg ti suspek a gappuanan iti panagririda.
Innayon ni Castillo a pinasingkedan ti suspek a nangala iti bolo ti biktima nga aramatenna koma kontra kenkuana ket idi darupenna, linapdanna babaen iti panangibagana a dadaelenna iti biagna ket idi ituloy latta ti biktima iti panggepna ket innalanan iti paltog ket imputokna.
Maysa a calibre 38 revolver iti naala a naaramat iti pammaltog ken adda pay naala a lima a live ammunition ken maysa a fired cartridge.
