Pinasingkedan ti Presidential Anti-Organized Crime Commission (PAOCC) a nakapanawen iti pagilian ni dismissed Bamban, Tarlac Mayor Alice Guo ket posible nga adda ita idiay Indonesia.
Segun ken ni PAOCC Spokesman Winston Casio, mapapati a nakasangpet idiay Indonesia idi August 18, 2024 ni Guo wenno Chinese citizen Guo Hua Ping.
Kinumpirmaran ni Casio a nakapanawen iti pagilian ni Alice Leal Guo kas maibasar ti immigration records iti foreign counterparts.
Nakasangpet ni Guo idiay Kuala Lumpur, Malaysia idi July 18 manipod Denpesar, Indonesia babaen ti Batik Air 177.
Nakasangpet idiay Singapore manipod Kuala Lumpur babaen ti Jetstar Asia 686 idi July 21 ket idi August 18 nakasangpet idiay Batham, Indonesia manipod Singapore babaen ti ferry boat.
Kinuna met ni Immigration Commissioner Norman Tansingco a nakaawat ti impormasyon ti bureau a nakapanaw ni Guo iti pagilian a saan a dimmalan kadagiti immigration authorities nu diketdi ilegal a nagbiahe idiay Malaysia idi Hulyo.
Mapapati a nagbiahe ni Guo idiay Singapore kaduana da Shiela Guo ken Wesley Guo.
Maipalagip nga imbutaktak ni Senador Risa Hontiveros a nakapanaw iti pagilian ni Guo idi July 18 a nagturong idiay Kuala Lumpur, Malaysia babaen ti Philippine passport-na.
