Konektado ni Dismissed Bamban, Tarlac Mayor Alice Guo ken ni mapapati nga illegal Philippine Offshore Gaming Operator (POGO) kingpin Lyu Dong kas kinuna ti maysa a witness nga adda iti kustodiya ti Presidential Anti-Organized Crime Commission.
Segun ti witness, am-ammoda ni Guo a Madam Wah a regular nga agrepreport ken ni Lyu inaig iti progreso ti konstruksyon ti Zun Yuan Technology Inc., maysa a POGO hub iti sakup ti Baofu Land Development idiay Bamban.
Kinunana a partner-da, ngem nangatngato latta ni Boss Boga.
Naamiris laeng ti witness a ni Madam Wah ket ni Guo idi nangrugin iti panagsarita ni Guo iti Senado nga agim-imbestigar iti criminal activities dagiti POGO hub.
Naimatangan pay ti witness nu kasano a mator-torture dagiti tattao babaen ti bilin ni Lyu.
Patien met ni PAOCC executive director Gilbert Cruz a ni Lyu ti saan a kayat nga inaganan ni Guo kadagiti public hearing iti House of Representatives ken ti Senado ta mabuteng para iti kinatalgedna.
Nakemmeg ni Lyu kaduana dagiti sangapulo ket dua a Chinese ken siam a Pilipino a kakaduada idiay Biñan, Laguna idi rabii ti Huebes.
Naduktalan ti PAOCC a ni Lyu iti responsible iti sumagmamano a POGO pakairamanan ti Lucky South 99 idiay Porac, Pampanga ken Zun Yuan Technology idiay Bamban.
Karaman pay nga agop-operate ni Lyu iti lima a rehiyon nga isu iti Ilocos, Central Luzon, Calabarzon, Central Visayas ken Metro Manila.
