Inlibak ni dati a Mayor Alice Guo nga adda relasionda ken ni Sual, Pangasinan Mayor Liseldo ‘Dong’ Calugay.
Kabayatan ti hearing ti Senate Committee on Women, kinuna ni Guo a gayyemna laeng ni Calugay ken saanna a nobio.
Dinamag met ni Senate President Pro Tempore Jinggoy Estrada iti dati a mayor maipapan iti ‘Alisel Aquafarm’ idiay Sual, Pangasinan a nairehistro a kukua ti mapapati a kabsatna a ni Shiela Guo.
Impakita ni Estrada a ti nagan nga ‘Alisel’ ket mabalin a kombinasion da Alice ken Liseldo, ngem segun ken ni dati a Mayor Alice, awan ti farm-na nga Alisel.
Kinunana nga adda laeng proposal a mangbangon iti Aquafarm ken planoda a maibangon idiay Sual, Pangasinan ngem saan a nairaman ni Calugay iti plano, saanna a malagip ti nagan ti talon ken no nagtultuloy daytoy.
