Pinasingkedan ni dati a Surigao del Norte Rep. Ace Barbers a saan a makanay a pammaneknek a pudno nga adda recipient ti confidential funds ti panangdakamat kadagiti sumagmamano a nagan iti records ti Office of the Vice President kas kadagiti alias.
Segun ken ni Barbers, kasapulan a paneknekan ti depensa no asino ti pudno nga immawat iti kuarta, asino ti nangibilin, ken ayanna dagiti rekord a mangpaneknek kadagiti transaksion.
Immunan nga impaganetget ti defense panel nga adda alias dagiti sumagmamano a nagan iti acknowledgment receipts, agraman ti “Mary Grace Piattos,” idinto nga inyunay-unayna pay a ti kinaawan recordda iti PSA ket saanna kayat a sawen a peke ti maysa a tao.
Innayon ti kongresista a numan pay mabalin a maaramat ti confidential funds para iti sensitibo nga operasion, agtaltalinaed ti obligasion ti gobierno a paneknekan a nagastos ti pondo iti otorisado a kalikagum.
