Naalisan manen iti maikatlo a gundaway ti actress vlogger a ni Alex Gonzaga, kas imbutaktak ti asawana a ni Mikee Morada.
Segun ken ni Mikee, saanda a ninamnama ti panagsikog ni Alex ta saandan a plano ngem idi matakuatanda a masikog, dagus a nagpakonsultada iti OB ket nasayaat met ti kasasaadna.
Iti maikadua a lawas, mayat pay met ti ultrasound-na ngem iti maikatlo a lawas ket imbaga kadakuadan ti doktor a blighted ovum.
Nag second opinion dagiti agassawa ta nakaawatda iti mensahe manipud iti maysa pay nga OB a mangaw-awis kenni Alex.
Idi madanonda ti maikapat nga ultrasound, adda ubing iti uneg ket sabsabali pay ti rikna ni Mikee iti mangngegna ti pitik ti puso ti putotna iti umuna a gundaway ngem natakuatanda manen a nababa ti heartbeat na ta 65 laeng isu a napanda iti ospital ayatda a maisalbar ngem idi December 28, nakitada ti embryo, nga awanen ti pitik ti pusona.
October 2023 idi maalisan idi maikadua a gundaway ni Alex idinto nga idi October 2021 ti damo.
