VIGAN CITY – Saan pay laeng a maipatungpal ti Alert Level System ditoy probinsia uray addan ti IATF resolution a nayetnag a ti Region 1 ket karaman iti Alert Level System Phase 2.
Segun ken ni Chief of Hospital ti Ilocos Sur Provincial Hospital Gabriela Silang Dr. Trina Tabboga Talaga, awan pay ti naited nga actual classification ti probinsia para iti Alert Level System numan pay epektibon idi kalman ti nasao nga addang.
Nupay kasta, nakasagana ni Gov. Ryan Singson ta addan ti executive order na idi napan a lawas ngem saan pay laeng a mayanunsyo no ania ti maipatungpal nga alert level classification ta awan pay ti formal announcement ti national government.
Inlawlawag ni Talaga nga awanen dagiti community quarantine status a masurot ket mayuray laengen no ania ti alert classification ti probinsia ita a lawas.
Dua a lawas nga epektibo ti Alert Level kalpasan ti pannakayawagna ken saan a bumaba no di ket mabalin laeng a maingato no ngumato ti bilang dagiti kaso.
