Nangidonar iti alcohol ken face shield iti University of Northern Philippines babaen iti panangidaulo ni President Dr. Erwin Cadorna ket impaayda kadagiti frontliners kadagiti checkpoint, covid-19 hospital, Rural Health Unit, Command Center iti IATF ken Philippine Red Cross.
Segun kenni Dr. Cadorna, bukodda a produkto dagiti nasao nga alcohol ken face shield ta napanunotanda iti agaramid tapno makatulong kadagiti frontliners.
Babaen iti panangformulate-da iti alcohol iti laboratoryo iti pagadalan ket dita a nakaaramidda met iti nasao nga alcohol idinto a nakaaramidda met iti face shield babaen kadagiti improvised a plastic ken sticker.
Kalpasan iti dayta ket impadas ti Presidente iti nag-fund drive iti pondo a targetda iti tallo gasut a ribo a pisos agingga uppat a gasut a ribo a pisos ngem saanna a ninamnama a makaur-orda iti umabot pito gasut lima pulo a ribo a pisos nga isu iti inaramatda a pinaggatang kadagiti food pack a naited kadagiti na-stranded nga agad-adal iti UNP, janitor, maintenance, electrician iti pagadalan kasta pay kadagiti RHU ken frontliners ditoy probinsia.
Innayonna pay a ti nasao a naur-or a pondo ket nagtaud manipod kadagiti faculty, non-teaching, alumni, agad-adal ken dadduma pay benefactors iti pagadalan.
