Nainget a bambantayan ti Albay provincial government, babaen iti panangidaulo ti Albay Public Safety Emergency Management Office iti umadani a bagyo a sumrek iti Philippine Area of Responsibility a maawagan iti ‘Caloy’ gapu iti posible a panangitundana iti rain-induced lahar manipud iti Mayon Volcano.
Segun kadagiti otoridad, nasurok 43,000 a pamilia ti mabalin a maapektaran kadagiti ili ken siudad nga adda iti aglawlaw ti bulkan, agraman ti Tabaco City, Malinao, Guinobatan, ken Ligao City.
Nagballaag ti APSEMO a mabalin a saan nga agbalin a predictable ti panagayus ti lahar gapu kadagiti naurnong a volcanic deposit ken epekto dagiti naglabas a panagalburuto ti bulkan.
Nakasaganan dagiti evacuation plan, alikamen, ken response teams dagiti lokal a gobierno ken ahensia ti gobierno no bilang adda lahar flow.
Nagyaman met ni Albay Governor Noel Rosal iti nasapa a suporta ti national government kadagiti apektado nga agindeg ken mannalon.
