VIGAN CITY – Inkeddeng ti lokal a gobierno ti Sta. Maria a kanselaren ti Education Night ita April 2, 2024 kas paset ti panagrambak ti piesta iti nasao nga ili gapu ti panagrinnupak ti New People’s Army ken Philippine Army iti nagbeddengan ti nasao nga ili ken idiay Pilar, Abra.
Iti pannaki-uman ti Bombo Radyo Vigan ken ni Vice Mayor Michael Florendo manipod iti ili ti Sta. Maria, sinurotda ti pammilin ti Philippine Army ken Philippine National Police nga isardeng pay laeng ti aktibidad para ti kinatalged dagiti umili.
Segun ken ni Vice Mayor Florendo, binalakadanda dagiti umili nga agtalinaed laeng kadagiti pagtaenganda ket liklikan pay laeng ti rumuar.
Yurayda met ti pammilin manipod kadagiti otoridad nu mabalinton ti panagsublida para iti aktibidad ngem siniguradona a mapakaammoanto dagiti agnaed para ti pannakipasetda.
Kabayatanna, awan pay laeng met ti nairuar nga executive order para ti pannakasuspenso ti klase ti nasao nga ili ngem kinuna ni municipal administrator Greg Roa nga adda kadagiti school head nu pastrekenda dagiti estudyante wenno saan.
Iti agdama, kontrolado met ti sitwasyon iti nasao nga ili ta adun dagiti na-augment a kameng ti Philippine Army para ti panangkita ti kinatalged iti lugar.
VIDEO – VICE MAYOR MICHAEL FLORENDO
