Mayur-uray ti panagpapatang dagiti karaman iti aksidente idiay Barangay Ayusan Sur, Vigan City Ilocos Sur.
Ti aksidente ket nakairamanan ti maysa a pickup truck nga Isuzu D-MAX, Suzuki Raider a motorsiklo ken maysa a pedestrian.
Nabigbig ti nagmaneho iti pickup a ni Glenn Ford Llanes Anicoche, agtawen iti uppat a pulo ket dua, LGU employee, taga-Bongtolan, Vigan City.
Kabayatanna, ti drayber ti motorsilo ket ni Jerry Mar Arce Reg, agtawen iti duapulo ket maysa, taga-San Pedro, Vigan City.
Ti met pedestrian ket ni Rowie Astrologio Quitevis, agtawen iti duapulo ket uppat, taga-Barangay Rugsuanan, Vigan City.
Iti pannaki-uman ti Bombo Radyo Vigan ken ni PLT. Reynaldo Mendoza Jr., agpapa-amianan ti pick up nga agturong iti kannigid idinto a ti motorsiklo ket adda iti bangir a linya nga agpaabagatan.
Idi madanonda ti nakapasamakan ti aksidente, nagdinnungpar dagiti dua a lugan, ket naipurwak ti drayber ti motorsiklo, tallo metro ti kaadayona manipud iti nakapasamakan ti aksidente, ket aksidente a nadungparna ti pedestrian.
Gapu dayta, nagsagaba iti dunor ti drayber ti motorsiklo ken pedestrian iti nadumaduma a paset ti bagida ket naipanda iti ISPH-Gabriela Silang, Tamag, Vigan City para iti pannakatamingda, idinto ti drayber ti pickup ket saan a naan-ano.
