VIGAN CITY – Maysa ti natay iti napasamak nga aksidente iti national Highway Barangay San Nicolas, Candon City a nakairamanan ti Honda Click Motorcycle, Kurong-kurong, ken Partas.
Nabigbig ti nagmaneho ti motorsiklo a ni Richmond Torio Madarang, agtawen iti tallopulo, residente ti Brgy. Bonuan Binloc, Dagupan City, Pangasinan, ti backride na ket ni John Ponce Escranda, agtawen iti duapulo ket walo, contractor, ken agdama a residente ti Brgy. San Agustin, Candon City.
Ti driver ti Partas Bus ket ni Jeppy Agustin Argallan, agtawen iti uppat a pulo, residente ti District 4, San Manuel Isabela.
Ti driver ti kurong-kurong ket ni Richard Abaya Mallari, agtawen iti tallopulo ket siyam, ken ti backride na ket ni Lim Jeddie Canno, agtawen iti duapulo, agpada a residente ti Brgy. Patac, Galimuyod.
Iti pannaki-uman ti Bombo Radyo Vigan kenni Police Captain Sanshine Lozano, Deputy Chief of Police ti Candon City Police Station, agpada nga agpapaaminan a direksiyon ti motorsiklo ken kurong-kurong, idinto a ti Partas ket agpapaabagatan.
Kabayatan ti panagdaldaliasat ti kurong-kurong iti national highway, sumarsaruno met ti nakamotorsiklo agingga a natukbob na iti kurong-kurong a rason iti pannakaiwarsi ti driver gapuanan ti pannakapilid kenkuana ti Bus.
Gapu iti pasamak, naipan ti driver ti kurong-kurong iti Candon City Hospital ngem pimmusay, idinto ti backride na ket matamtaming pay laeng.
Nagsagaba met ti dunor ti driver iti motorsiklo ken ti backride na, ken naipanda ti Ilocos Sur Medical Center para iti naan-anay a pannakatamingda.
Saan met a naan-ano ti driver ti bus ken dagiti pasahero.
Segun ken ni Police Captain Lozano, basol iti Honda click iti napasamak nga aksidente kas maibasar kadagiti naalada a CCTV Footage, ken inamin ti driver ken backrider-na a nakainom da iti arak.
Addan iti initial a nagpatangan ti pamilya iti driver ti kurong-kurong ken iti driver ti motorsiklo, idinto ti driver ti Bus ket iyur-uray da pay iti desisyon ti legal da sakbayda nga agtignay.
