VIGAN CITY – Dua ti nadunor iti napasamak nga aksidente ti National Highway idiay Brgy. San Juan, Sta. Lucia a nakairamanan ti Izusu truck ken Toyota Fortuner.
Nabigbig ti driver iti Truck a ni Spencer Balibay Ugot, agtawen iti duapulo ket lima, ken residente ti Brgy. 17, Tabug, Batac City, ken ti pasaheros na ket ni Joven Serdenia Abenceña Jr., agtawen iti tallopulo ket lima, residente ti Brgy. Palungpong, Batac; idinto ti nagmaneho ti Fortuner ket ni Father Rufo Valdez Abaya, agtawen iti limapulo, Parish priest ti Salcedo, ken residente iti Brgy. Camangaan, Santa Cruz.
Maibasar iti CCTV Footage, agpapaabagatan ti truck, ket idi nakadanon iti nakapasaman ti aksidente, adda ti Fortuner iti southbound shoulder a nakasango iti amianan ket idi agballasiw iti kalsada, kellaat a pimmartak ti panagpataray na a gapuanan ti panagdinnungparda ti Truck, uray no pinadas a liklikan ti drayber ti Truck ti Fortuner.
Gapu dayta, nagsagaba ti dunor iti makinkannawan a saka ti pasaheros ti truck, saan met a naan-anu ti driver; idinto ti fortuner ket nadunor ti sakana, agsakit ti barukongna isu a naipanda amin iti Ilocos Sur district hospital, Santa Lucia para iti naan-anay a pannakatamingda.
