Dua a drayber ti nadunor iti aksidente a napasamak iti national highway, Barangay Barangobong, Sta. Lucia, Ilocos Sur.
Ti traysikel ket minaneho ti maysa a lalaki nga agtawen iti tallopulo ket pito, taga-Barangay Namatican.
Ti met motorsiklo ket minaneho ti maysa a lalaki nga agtawen iti limapulo ket pito, taga-Barangay Damacuag.
Karaman pay ti maysa a utility van a minaneho ti maysa a lalaki nga agtawen iti innem a pulo ket lima, taga-Barangay San Nicolas, Candon City.
Agpapa-abagatan ti traysikel ken motorsiklo, idinto nga aggapu iti bangir a linya ti utility van.
Idi nagtengda ti nakapasamakan ti aksidente, nag-overtake ti motorsiklo iti sarsarunwenna a four wheels ngem idi nagsubli iti linyana ket isu met ti pannakatukbobna iti traysikel.
Gapu iti impact, naipurwak ti motorsiklo iti bangir a linya ket nagdinnungparda iti utility van.
Nadunor dagiti drayber ti traysikel ken motorsiklo a naipaagas met iti ospital para iti pannakatamingda.
Kabayatanna, saan met a naan-ano dagiti naglugan iti utility van.
