VIGAN CITY – Maysa ti pimmusay iti napasamak nga aksidente iti national highway idiay Barangay Curtin, Sinait idi rabii ti Biernes Santo.
Ti biktima ket ni Jerry Villegas, konsehal, nagmaneho iti Black Honda TMX, backrider na ti putotna a ni Atty. Jerry Villegas Jr., agpada a taga-Barangay Tubigay, Sinait idinto a ti Toyota Innova ket minaneho ni Valentino Reotutar, agtawen iti innem a pulo ket siam a taga-Barangay San Jose, Vigan City.
Nakaawat iti report ti Sinait Police Station nga adda napasamak nga aksidente iti nasao a lugar ket idi agrespondeda, nadanunda a nakaidda iti kalsada ti driver ti TMX ken ti backrider-na nga insigida met a naipan iti ospital para ti pannakatamingda ngem pimmusay ti drayber bayat ti pannakatamingna.
Iti imbestigasyon ket agpapa-amianan a direksyon ti motorsiklo idin ta nasapgid ti Toyota Innova nga aggapu iti bangir a linya bayat ti panag-overtake na iti sabali pay a lugan.
