VIGAN CITY – Awan ti nadangran ti napasamak nga aksidente idiay sango ti Cabugao food court iti Brgy. Rizal, Cabugao, Ilocos Sur a pakairamanan ti Sinotruck self-loader ken Mitsubishi triton pick-up.
Nabigbig iti nagmaneho ti truck a ni Estelito Aguila Pacatan Jr., agtawen iti uppat a pulo ket walo, residente ti Barangay. Ilayang Yuni Mulanay, Quezon; idinto nga iti driver ti pick-up ket ni Rosalina Garcia Rizo Jose, agtawen iti limapulo ket innem, residente ti Brgy. Alinaay Cabugao.
Sakbay ti aksidente, agpapaabagatan a direksyon ti truck idinto a nakaparada ti pick-up iti sango iti food court Cabugao, ket idi agkurba ti truck nag-miscalculate daytoy isu a nadungparna ti pick up.
Gapu dayta, nadadael iti makinlikud a silaw ti pick-up, ken iti agdama ket adda itan ti kustodiya ti Cabugao Municipal Police Station dagiti nairaman a lugan para iti disposition.
