VIGAN CITY – Im-imbestigaran dagiti kameng ti Sinait municipal police station ti napasamak nga aksidente idiay Barangay Pug-os, Sinait a nakairamanan ti maysa Dumptruck a minaneho ni Eliezer Alipio, agtawen ti tallo pulo, agnaed idiay Brgy. Dibua North, Laoag City, Ilocos Norte ken Mitsubishi L300 a minaneho ni Pacifico Castillo nga agtawen ti lima pulo ket lima nga agnaed idiay Brgy. Pug-os, Cabugao a dead on arrival iti balay pagagasan.
Segun ken ni Police Executive Master Sergeant Frazier Simbe, mapapati a nabartek ni Castillo agsipud ta napaspas iti panagpatarayna iti luganna ket diniretsona iti kurbada a paset ti kalsada ken idi immagaw ti linya ket nakadinnungparna ti dumptruck nga agpapaamianan a direksiyon.
Nagsagaba iti nakaro a dunor ti nadumaduma a paset ti bagi ti biktima a puon ti nakatayanna sa arigna napitpit dagiti lugan a minanehoda.
Ikot dagiti pannakabagi ti linteg ti nagmaneho ti dump truck a nagkiddaw pay iti pammakawan kadagiti pamilia ti biktima gapu iti napasamak ngem kinunana nga awan iti mangayat iti aksidente.
