VIGAN CITY – Nagsagaba iti dunor iti naduma-duma a paset iti bagi na dagiti nairaman iti panagdinnungpar ti motorsiklo ken maysa a Honda TMX nga adda sidecar na idiay Sitio Limmansangan, Barangay Margaay, Narvacan idi kalman.
Nabigbig dagiti biktima a da Rafael Cabonce nga agtawen ti uppat a pulo ket tallo nga agnaed idiay Barangay Sta. Lucia, Narvacan a nagmaneho ti Yamaha 125 motorcycle kenni Eusebio Lazarte nga agtawen ti uppat a pulo ket tallo nga agnaed idiay Barangay Paratong, Narvacan a nagmaneho ti Honda TMX.
Naitaray iti kaasitgan nga ospital dagiti biktima ngem ni Lazarte ket naiyakar idiay Regional Training and Medical Center, San Fernando, La Union.
Segun kenni Police Executive Master Sergeant Analisa Jamandra, deputy chief of police ti Narvacan Municipal Police Station, agpapaabagatan a direksyon ni Cabonce idi mapapati nga immagaw iti linya ni Lazarte nga agpapaamyanan a direksyon isu a nagdinnungpar da.
Innayon ni Jamandra a mapapati a nakainom iti arak ni Cabonce idi nagmaneho iti motorsiklo.
Kabayatanna, adda metten iti inisyal a patangan iti nagbaetan dagiti karaman ti aksidente.
