VIGAN CITY – Tallo nga indibiwal iti nadundunor iti vehicular traffic incident a napasamak idiay Cervantes-Tadian road, Brgy. Aluling, Cervantes.
Nabigbig dagiti nadunor a da Marcial Seduro, agtawen ti duapulo ket siam, baro nga agnaed idiay Brgy. Aluling, Cervantes a nagmaneho iti ISUZU truck, ken ti dua a pasaherona a da Jones Lee Payay, agtawen ti sangapulo ket innem ken Adeson Bantic, agtawen ti sangapulo ket tallo nga agpada nga agnaed iti nasao a lugar.
Maibasar ti pakpaka-una nga imbestigasyon dagiti pannakabagi ti linteg, agturong ti laud a direksyon ti truck nga adda linaonna a tallogasut limapulo a pidaso iti hollow blocks idin nadanonna iti agpababa a paset ngem naawanan iti preno agingga a nagderetso iti derraas.
Gapu iti dayta ket nadundunor dagiti biktima a naipan iti Ilocos Sur District-Bessang Pass Hospital, Cervantes para iti pannakatamingda.
