VIGAN CITY – Nagsagaba ti dunor ti ulo ti maysa a lalaki a puon ti nakatayanna idinto a nadundunor ti kaduana a nagmotorsiklo gapu ti pannakatinnagda iti maysa a kanal iti kalsada a sakupen idiay Brgy. Babayoan, Sta. Cruz, Ilocos Sur.
Iti pannaki-uman ti Bombo Radyo Vigan ken ni PCapt. Roger Baling-oay a hepe iti Sta. Cruz Municipal Police Station, nabigbig ti natay a ni John Joel Lamaran a taga-Mambog, Sta Cruz idinto a ti nadunor ket ni Roldan Aguilar nga agindeg idiay Mantanas, Sta. Cruz.
Segun ken ni Baling-oay, agpada a nakainom iti arak dagiti dua a naglugan ti motorsiklo ken saan a nagaramat ti helmet ket posible a napaspas pay iti panagpatarayda isu nga idi nakadanonda iti nasao a lugar ket natinnagda iti kanal a gappuanan ti pannakadundunorda ken pannakatama iti bato ti ulo ni Lamaran.
Posible a saan a dimmalan kadagiti addaan ti checkpoint dagiti dua a naggapo iti sabali a barangay iti ili isu a saanda a nasitar dagiti pannakabagi ti linteg.
Nagpalagip ti hepe kadagiti umili nga adda iti agdama a liqour ban iti nasao a lugar a naipatungpal maniopod pay laeng idi napalabas a tawen.
