VIGAN CITY – Tallo a tattao ti nadunor iti napasamak nga aksidente a nakairamanan ti traysikel, kotse ken truck itay alas syete singkwentay singko iti bigat (June 19, 2024) idiay Barangay Poblacion, Sto. Domingo, Ilocos Sur.
Ti nagmaneho ti Euro Tricycle ket ni Freddie Tabangin Tabilin, agtawen iti uppat a pulo ket maysa, naasawaan, kaudana iti agtawen tallo nga ubing ken Freda Mae Tabilin, agtawen iti duapulo ket maysa nga agpapada a taga-Brgy. Nalasin, Sto. Domingo; ti nagmaneho ti Toyota Vios ket ni Patrolman Jeffrey Jimbo Ularte, agtawen iti tallopulo ket lima, naasawaan, PMP Member a na-assign iti Ilocos Sur Police Provincial Office nga agnaed idiay Barangay Clemente, Magsingal; ken ti nagmaneho ti Forward Aluminum Van a ni Noli Vista Flores, agtawen iti uppat a pulo ket siam, naasawaan nga agnaed idiay Barangay Cabanatuan Hen T De Leon Valenzuela City.
Iti pannaki-uman ti Bombo Radyo Vigan ken ni PCapt. Joseph Fieldad nga Officer-in-Charge iti Sto. Domingo Municipal Police Station, sarsarunwen ti truck ti traysikel bayat nga agpapaamianan idinto nga agpabagatan ti kotse nga adda iti bangir a linya idin nagmenor ti traysikel ngem natukbob ti sumarsaruno a truck a rason iti pannakadarasudosna a naipan iti linya ti kotse a puon ti aksidente.
Segun kenkuana, nagsagaba ti minor injuries dagiti naglugan ti traysikel isu a naipanda iti Northside Doctors Hospital-Bantay para ti pannakatamingda idinto a saan a naan-ano ti nagmaneho ti kotse ken truck.
Nupay kasta, nakapagpapatanganen dagiti karaman iti aksidente para ti magastos kadagiti nadadael a paset dagiti lugan ken pannakataming dagiti naglugan ti traysikel.
VIDEO – PCAPT. JOSEPH FIELDAD
