VIGAN CITY – Nagsagaba iti dunor ti akin-kannigid a saka ti nagmaneho iti closed van iti napasamak nga aksidente a nakairamanan ti tallo a lugan idiay Barangay Ayudante, Candon City.
Ti SUV ket minaneho ni Veronica Vilog, agtawen iti uppat a pulo ket innem, mangisursuro a taga-Barangay Quinsoriano, Sta. Cruz; ti bus a nairehistro ken ni Catherine Seguno a taga-Beddeng Laud, Vigan City ket minaneho met ni Eduardo Pipo, agtawen iti uppat a pulo ket dua a taga-Barangay Buquig, Bantay idinto a ti aluminum closed van a nairehistro iti JT INTERNATIONAL PHILIPPINES INC. ket minaneho ni Jacky Salem, agtawen iti tallopulo ket tallo a taga-Barangay Sagayaden, Cabugao.
Agpada nga agpapa-abagatan ti closed van ken ti bus idin ta ti agpapa-amianan a Ford Ranger ket immagaw iti linya ti SUV ket nadungparna ti akin-kannigid a paset ti bus nga isu ti nakadungpar iti sangwanan a paset ti closed van.
Gapu dayta, nagasgasan ti akin-kannigid a paset ti Ford Ranger ken nadadael met ti akin-sango a paset ti closed van.
Nupay kasta, saan met a naan-ano ti drayber ti SUV ken drayber ti bus.
