VIGAN CITY – Dead on Arrival iti ospital ti maysa a lalaki a nagmotorsiklo ken nadundunor ti back rider-na kalpasan ti aksidente a napasamak idiay Barangay Magsaysay District, Santa, Ilocos Sur idi kalman November 11, 2023 a nakairamanan pay iti maysa nga SUV ken canter truck.
Ti nagmaneho iti Isuzu Raider a color blue ket ni Quirino Reintar Gorospe, agtawen iti tallopulo ket siam, baro nga agnaed idiay Barangay Namruangan, Cabugao idinto a ti back rider-na ket ni Celeste Sarte Palomares, agtawen iti tallopulo ket tallo, naasawaan nga agnaed idiay Sta. Cruz, Sinait.
Ti met nagmaneho iti MUX SUV ket ni Jaylord Cardenas Dameg, agtawen iti tallopulo ket uppat, baro, self-employed nga agnaed idiay Barangay Quezon District, Santa; ken ti nagmaneho iti JTC Truck Mitsubishi Fuso Canter ket ni Edwin Biri Piano, agtawen iti uppat a pulo ket tallo, naasawaan, company driver nga agnaed idiay Barangay San Julian West, Bantay.
Iti pannaki-uman ti Bombo Radyo Vigan ken ni PCapt. Mark Bryan Corpuz a hepe iti Santa Municipal Police Station, agpapabagatan a direksyon ti motorsiklo idin ti SUV nga adda iti bangir a linya ket nagsikko isu a linisyan ti nakamotorsiklo ngem naidungpar latta iti sango a paset iti SUV ken naideretso pay ti motorsiklo iti nakaparking a canter truck iti igid iti kalsada.
Napaspas ti panagpataray ti nakamotorsiklo isu a saan a nakapreno nupay impadasna a lisyan ti SUV.
Gapu iti sinagaba a dunor ti nagmaneho iti motorsiklo ken backriderna ket naipan iti Vigan Cooperative Hospital – Bantay ngem naideklarar a dead on arrival ti driver gapu ti dunor ti ulona idinto a ti backrider ket manarimaanen iti panagpalaingna.
Nagpalagip ni Corpuz kadagiti motorista iti panagpokus bayat ti panagmaneho ken saan a napataray tapno maliklikan iti pannakaaksidente.
VIDEO – PCAPT. MARK BRYAN CORPUZ
