Maysa ti nadunor iti napasamak nga aksidente iti provincial road ti Zone IV, Bantay, Ilocos Sur kangrunaan iti intersection ti kalsada iti sangwanan ti Department of Public Works and Highways.
Dagiti karaman ti aksidente ket ti maysa a Honda Click a motorsiklo a minaneho ni Mayla Amante Villar, agtawen iti tallopulo ket tallo, taga-Sta. Rosa, Laguna, agnaed iti Barangay Suksukit, Sto. Domingo, kinaluganna ni John Michael Azurin Empleo, agtawen iti tallopulo ket maysa, negosyante, taga-Barangay Suksukit, iti nasao nga ili.
Kabayatanna, ti met nagmaneho iti BMW Sedan ket maysa a menor de edad nga agnaed iti ili ti Bantay.
Iti pannaki-uman ti Bombo Radyo Vigan ken ni Police Captain Sherwin Beroña, agpapa-abagatan ti motorsiklo idinto nga agpadaya ti sedan ket idi magtengda ti intersection, bigla a nagsikko nga agpakannigid ti sedan ket pinadas met a linisyan ti motorsiklo ngem nagdinnungparda.
Gapu dayta, nadunor ti timid ken akin-kannawan a dapan ti nagmaneho iti motorsiklo ken nadunor pay met ti kinaluganna.
Naipaagasda iti ospital para iti naan-anay a pannakatamingda.
