VIGAN CITY – Maysa iti nadunor iti napasamak nga aksidente iti Barangay Banuar, San Juan a nakairamanan ti Mitsubishi L300 Van ken Wing Van Truck.
Nabigbig ti nagmaneho iti L300 Van a ni Oscar Unana Veracion, agtawen iti innem a pulo ket dua, naasawaan, mannalon, ken residente iti Barangay Sunggiam iti nasao a ili, idinto a ti nagamaneho met ti Wing Van Truck ket ni Christopher Eugenio Santos, agtawen iti limapulo ket maysa, naasawaan, ken residente iti Pulo Maugat, San Antonio, Nueva Ecija.
Agpada nga agpapa-amianan a direksiyon dagiti dua a lugan, idi bigla a nagsikko ti L300 Van a nagpakannigid, ket natukbob ti sumarsaruno a Wing Van Truck.
Gapu dayta, naidungpar met ti L300 van iti poste.
Nagsagaba iti dunor ti ulo ken dadduma a paset iti bagi ti nagmaneho ti L300 Van a dagus a naipaagas iti Pira Clinic and Hospital iti Cabugao para ti pannakatamingna, idinto a ti driver iti Wing Van truck, ken helper-na ket saan a naan-anu.
Segun iti pamilya ti nagmaneho iti L300 Van, awan met ti nagbalin a parikut iti CT-Scan na, ngem mayakar isuna iti Batac, Ilocos Norte para ti naan-anay a pannakatamingna.
