VIGAN CITY – Maysa ti nadunor iti napasamak nga aksidente idiay Barangay Calanutian, Sinait a nakairamanan ti maysa a motorsiklo ken SUV.
Nabigbig ti nagmaneho iti Yamaha Mio a motorsiklo a ni John Anthony Sarmiento Unclos, agtawen iti tallopulo ket maysa, agnaed iti Barangay Sarsaracat, Magsingal.
Ti met nagmaneho iti Isuzu MUX SUV ket ni Claudio Andres Balisacan, agtawen iti pitopulo, agnaed iti Barangay 4 Samonte Street, Laoag City, Ilocos Norte.
Agpapa-amianan ti motorosiklo idin ta ti SUV nga adda iti bangir a linya ket inovertakean-na ti bus a puon ti pannakadungparna iti motorsiklo.
Gapu dayta, nadunor ti dua a saka ken rupa ti nagmaneho iti motorsiklo a naipaagas iti ospital para ti naan-anay a pannakatamingna idinto a saan a naan-ano ti drayber ti SUV ken dagiti inluganna.
