VIGAN CITY – Dua ti nadunor iti napasamak nga aksidente a nakairamanan ti maysa a dump truck ken wing van iti national highway idiay Brgy. Gabur Sur, Sta. Cruz.
Segun ti Sta. Cruz Municipal Police Station, ti nagmaheno ti nangisit nga Isuzu dump truck ket ni Chester Cabradilla Bermudez, agtawen ti tallopulo ket lima, baro nga agnaed idiay Brgy. Maria Cristina East, Bangar, La Union idinto a ti nagmaneho iti puraw nga Isuzu PEGA Wing van ket ni Ronel Gallego Oasan, agtawen ti uppat a pulo, naasawaan, government employee nga agnaed idiay Brgy. Patpata 2nd, Candon City; ken dagiti pasaherona ket da Sadiri Llanes Castillo, agtawen ti uppat a pulo ket pito, baro; ken Alexis Tabuso Ramos Jr, agtawen ti duapulo ket dua, baro nga agpada nga agnaed idiay Brgy. Bagani Campo, Candon City.
Bayat nga agturong ti bagatan a direksyon ti dump truck iti national highway ket kellaat a nagsardeng ti bus nga adda iti sangwananna ta nagisakay iti pasaherona isu a nagsardeng met ngem isu metten iti pannatukbob iti wing van nga adda iti likodanna.
Gapu ti pasamak, nadadael ti windshield ti wing van kasta payen ti frame panel-na.
Nupay kasta, agpada a saan a naan-ano ti dua a driver idinto a dagiti dua a pasahero ti wing van ket nadunor isu a naipanda iti RHU-Sta. Cruz para iti pannakatamingda.
