Tallo ti nadunor iti napasamak nga aksidente iti provincial road ti Barangay Camindoroan, San Juan, Ilocos Sur a nakairamanan ti dua a motorsiklo.
Ti TMX motorcycle ket minaneho ni Romel Viorje Ullero, agtawen iti limapulo ket tallo, backride-na ni Renato Gorospe Sarmiento, agtawen iti limapulo ket dua, agpada a taga-Barangay Camanggaan, San Juan.
Ti met Racal 100 motorcycle ket minaneho ni Mariel Gascon Vivit, agtawen iti duapulo ket dua, taga-Barangay Surngit, San Juan.
Iti pannaki-uman ti Bombo Radyo Vigan ken ni PLT Reynald Ramos, Deputy Chief of Police ti San Juan Municipal Police Station, agpapalaud ti Racal motorcycle ket idi magtengna iti nakapasamakan ti insidente, nag-overtake ti TMX iti maysa pay a motorsiklo isu a nasagidna daytoy Racal.
Gapu dayta, nadunor dagiti nagkalubbon idinto a ti drayber ti Racal ket nagsagaba it nakaro a dunor iti akin-kannigid a sakana.
Agpapada a naipaagas iti ospital dagiti karaman iti aksidente para iti naan-anay a pannakatamingda.
