VIGAN CITY – Dua ti natay iti napasamak nga aksidente idiay Barangay Baliw, San Juan a nakairamanan ti dua a motorsiklo ken maysa a trak.
Nabigbig ti natay a ni Mirasol Pando, agtawen iti uppat a pulo, TSPI manager, taga-Quimmarayan, Sto. Domingo, backrider ti XRM a minaneho ni Joshua Purificacion, TSPI collector a taga-Naguilian, Caoayan.
Malaksid kenkuana, pimmusay pay ni Efren Ventura, agtawen iti limapulo ket innem, construction worker, a taga-Resureccion, San Juan, nagmaneho iti Rusi a motorsiklo.
Kabayatanna, ti Isuzu Trailer truck a nangpilid iti backrider ket nabigbig a ni Franklin Lewin Pascual, agtawen iti tallopulo ket lima, taga-Barangay Bugas, Banna, Ilocos Norte, ken ti kaduana a ni Ronaldo Jacinto, agtawen iti uppat pulo ket tallo, taga-Puttao, Solsona, Ilocos Norte.
Iti pannaki-uman ti Bombo Radyo Vigan ken ni Police Major Christopher Ramat, sarsarunwen ti XRM a motorsiklo ti trailer truck idin ta nag-overtake ti XRM ket nagdinnungparda iti Rusi a motorsiklo a nakasinnabetna.
Gapu ti panagdinnungpar dagiti dua a motorsiklo, naipurwak ti backrider a ni Pando ket napilidan iti trailer truck.
Nadunor ti nadumaduma a paset ti bagi dagiti biktima a naipaagas iti PIRA hospital, Cabugao ngem dead on arrival ti drayber ti Rusi ken ti backrider ti XRM idinto a ni Purificacion ket natalgeden ti kasasaadna.
Saan met a naa-ano ti drayber ti trailer truck nga adda iti kustodia ti San Juan Police Station tapno dumalan iti husto a proseso.
