VIGAN CITY – Maysa ti nadunor iti napasamak nga aksidente iti national highway idiay Barangay Villa Quirino, San Esteban, Ilocos Sur.
Dagiti karaman a lugan ket ti Honda TMX 125 a motorsiklo a minaneho ni Sonny Aro Lopez, agtawen iti uppat a pulo ket tallo, taga-Skyview Virac, Itogon, Benguet.
Ti met Black Toyota GL Grandia ket minaneho ni Gene Kian Wagayen Gadingan, agtawen iti sangapulo ket siam ken adda pay innem nga inluganna.
Agpapa-amianan ti motorsiklo idin ta bimmuntog ti taray ti sarsarunwenna a lugan isu a nagpreno ngem saanna a nakontrol ti manibelana ket nag-slide iti kalsada ken nasagid ti lugan a naggapu iti bangir a linya.
Nagsagaba ti drayber ti motorsiklo iti dunor ti ulo ken nadumaduma a paset ti bagina idinto a saan a naan-ano dagiti naglugan iti Grandia.
