Dua ti nadangran iti napasamak nga aksidente a nakairamanan ti tricycle ken motorsiklo idiay along national highway sakupen ti Barangay Poblacion Norte, Santiago.
Ti nagmaneho ti tricycle ket agtawen iti tallopulo ket walo, construction worker, residente ti Barangay Mambug, iti nadakamat nga ili.
Ti met nagmaneho ti Yamaha Sniper 155 motorcycle ket agtawen iti duapulo ket innem, back rider na iti agtawen tallopulo ket uppat, agpada a residente ti Abra.
Iti pannakiuman ti Bombo Radyo Vigan ken ni PCPT Justine Jeff Aguigam ti Santiago Municipal Police Station, agpada nga agpapa-amianan dagiti dua a lugan nga adda da iti inner lane ti national highway ket idi nadanon da ti nakapasamakan ti insidente, kellaat a nadungpar ti motorsiko iti likudan a paset ti tricycle.
Na-fracture dagiti ima ti nagmaneho ti Sniper idinto a ti backrider na ket nagsagaba ti dunor iti bagi na a dagus da a naipan iti balay pagagasan para ti naan-anay a pannakatamingda.
Saan met a naan-ano ti nagmaneho ti tricycle idi napasamak ti aksidente.
