Dua iti nadunor iti aksidente a nakairamanan ti nakabisikleta, nakamotorsiklo, bus ken L300 iti national highway idiay Barangay Barbarit, Magsingal, Ilocos Sur itay 10:10AM, January 7, 2025.
Dagiti karaman ket ti nakabisikleta a ni Apolinario Blando Unciano, agtawen iti pitopulo ket pito nga agnaed idiay Barangay Barbarit, Magsingal; ti nagmaneho ti nangisit a Yamaha Mio I 125 ket ni Karl Jeremy Velasco Garcia, agtawen iti sangapulo ket siam, baro a holder iti non-professional driver’s license; ti nagmaneho iti Tajardon Bus a ni Nelson Yabes Garcia, agtawen iti limapulo ket lima, naasawaan, holder iti professional driver’s license nga agnaed idiay Barangay Zapat, Sinait; ken ti nagmaneho iti puraw a Mitsubishi L300 ket ni Isagani Grande Sema, agtawen iti uppat a pulo ket innem, naasawaan, holder iti professional driver’s license a taga-Bessang, Cabugao.
Iti pannaki-uman ti Bombo Radyo Vigan ken ni PLt. Richard Pajo nga Officer-in-Charge iti Magsingal Municipal Police Station, agpapada nga agturong iti bagatan a direksyon dagiti lugan idi nadanonda iti nasao a lugar ket liniklikan ti nakabisikleta ti side clutter iti akin-kannawan a paset ti national highway ken napan iti tingnga a paset ti shoulder lane ngem nadungpar iti nakamotor a manarimaan nga agov-overtake.
Kalpasan a nadungparna iti nakabisikleta ket naawanan ti kontrol ti nakamotorsiklo a gappuanan iti panagturongna iti inner lane iti national highway a gappuanan ti pannakatukbob kenkuana ti sumarsaruno a bus, impadas met ti L300 a liniklikan ti aksidente ngem napaay isu a nairaman.
Agpada a nagsagaba ti dunor dagiti driver ti motorsiklo ken nakabisikleta nga agpada a naipan iti Ilocos Sur District Hospital, Magsingal para ti pannakatamingda idinto a saan a naan-ano dagiti pasahero iti bus.
Awan met iti nakainom iti arak idi napasamak iti aksidente kas maibasar ti eksaminasyon ni Dr. Merly Oracion.
Nagpalagip ni Pajo kadagiti motorista nga agannad nu agmaneho ken ipangruna iti panangsurot iti paglintegan iti kalsada.
VIDEO – PLT. RICHARD PAJO
